Promesas de castas nuevas

Por El Avisador - 19 de Marzo, 2013, 18:04, Categoría: General

Se nus van d'entre las manos
mu despacio y mu depriesa;
crecen asín, como espigas,
y asina, sin dagnos cuenta
se nus van jaciendo mozos
sin mirá p'atrá siquiera.

Del invierno calentino en el arrullo
saltan a la primavera
y florecen repentinas en sus cuerpos
promesas de castas nuevas.

Atrás quea l'añoranza
de verlos la ves primera,
sus primeras carantoñas
dispués de zugá la teta,
los sus primeros pasinos,
 la primera bicicleta,
la inocencia de sus caras
en su primer día d'escuela,
la primera comunión,
sus primeras pataletas... 

...¡Toas las cosas de los hijos
tién primeros o primeras! 

Se nus van a bocanás,
por más que uno no quiera,
como'l jumo enrevesao se va p'arriba
rejuyendo del caló d'una candela,
como'l polvo alevantao del camino
alreó de las carretas.

Y se nus van detrás d'ellos
jartá de noches en vela,
su angó y sus lenguas de trapo,
su risa'l jacerles fiestas,
los zapatos de charol,
sus libros y sus libretas;
y los ruíos que jacían
a la hora de la siesta.

Se nus van manque pongamos 
entroncaos palos traviesa;
y asín tié que sé, es asina,
por más qu'a uno le duela.

Se nus van por su camino
rebuscando otras querencias;
su sangre jierve encendía
como'l celo de las fieras,
con la juerza de los machos
y el coraje de las jembras.

Se nus van como se jueron 
sus padres de sus agüelas,
pa sembrá nuevas espigas
entoavía con más juerza,
sin descuidiar enjamás
el tronco de su nacencia,
que tié raíces mu jondas
enterrás en esta tierra,
Madre de los qu'ergullosos
semos de raza extremeña.

(Del libro "¡Asina! Sentimientos en castúo")
Javier Feijóo
fjavierfeijoo@hotmail.com

Permalink ~ Comentar | Referencias (0)

Calendario

<<   Marzo 2013  >>
LMMiJVSD
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Categorías

Archivos

Sindicación

Alojado en
ZoomBlog